Kigali, ku wa 22 Gicurasi 2025 - Guverinoma y’u Rwanda ibinyujije muri Minisiteri y’Ibikorwa Remezo n’Umujyi wa Kigali igiye gukomereza umushinga wo kuvugurura no kunoza imiturire i Nyabisindu mu Karere ka Gasabo. Uyu mushinga watangiye gushyirwa mu bikorwa uzakorerwa mu Midugudu ine: Nyabisindu, Amarembo I, Amarembo II na Ibuhoro mu Murenge wa Remera, ahazatuzwa imiryango isaga 1.600 yari isanzwe ihatuye mu buryo bw’akajagari. 

Uyu mushinga uzakorerwa ku buso bungana na ha 38,54 uje ukurikira undi wo kuvugurura no kunoza imiturire muri Mpazi, mu Murenge wa Gitega, Akarere ka Nyarugenge, ahaherutse kuzura inzu  zo gutuzwamo imiryango 688.

Muri rusange, inzu 1.639 ni zo zizubakwa aha Nyabisindu, zigizwe n’inzu zifatanye 58. Hazashyirwa inzu zigezweho zituza imiryango myinshi ku buso buto, hubakwe isoko, hashyirwe amashuri, ibyanya by’imyidagaduro, imihanda n’ibindi.

Minisitiri w’Ibikorwa Remezo Jimmy Gasore asobanura iby’uyu mushinga yagize ati: “Uyu mushinga urashimangira intego ya Guverinoma y’u Rwanda y’iterambere rirambye ry’imijyi. Ibi ntabwo ari ukubaka inzu gusa, ahubwo ni no kwihesha agaciro, kongera ibikorwa remezo tugeza ku baturage, no kugabanya ahantu hatuwe mu buryo budatunganyijwe. Buri Munyarwanda wese akwiye gutura ahantu hamuhesha ishema.”

Umuyobozi w’Umujyi wa Kigali Samuel Dusengiyumva na we yagize ati: “Gutangira umushinga wa Nyabisindu ni intambwe ikomeye yo gukomeza gushyira mu bikorwa uburyo bwo kuvugurura imiturire mu Mujyi wacu wa Kigali dufatiye urugero ku mushinga wa Mpazi. Turimo kubaka mu buryo bunoze kandi buhangana n’ingaruka z’imihindagurikire y’ibihe dufatanyije n’abaturage ubwabo, kandi nta n’umwe dusiga inyuma.”

Kanzayire Josiane, utuye mu Mudugudu w’Amarembo II yatubwiye ibyo biteze kuri uyu mushinga. Ati: “Tumaze igihe dutuye muri izi nzu zari zishaje. Dutewe ishema n’uyu mushinga kandi turawubonamo ahazaza heza h’abana bacu. Turemera tudashidikanya ko ubuzima twari tubayemo bugiye guhinduka.” Avuga ko yashimishijwe cyane n’uburyo yabonye Mpazi ubwo yasuraga inzu nshya ziherutse kuhubakwa. Ati: “Ndashimira Guverinoma y’u Rwanda, ariko cyane cyane Nyakubahwa Perezida wa Repubulika Paul Kagame udahwema kutugezaho ibyiza nk’ibi biduhindurira ubuzima.”

Biteganyijwe ko uyu mushinga uzashyirwa mu bikorwa mu gihe cy’umwaka umwe. 

---------------------

Ku yandi makuru, andikira Ishami Rishinzwe Itumanaho mu Mujyi wa Kigali ukoresheje Email: communications@kigalicity.gov.rw.