Kuri uyu wa Gatandatu, Abadepite mu Nteko Ishinga Amategeko y’u Rwanda batangiye ingendo bazagirira hirya no hino mu Mujyi wa Kigali mu minsi ibiri.

Ni muri gahunda yo gukurikirana imikorere n’imikoranire y’inzego z’imitegekere y’Igihugu zegerejwe abaturage, n’izindi nzego, mu gutanga serivisi cyane cyane iz'ikoranabuhanga. 

Mu biganiro babanje kugirana n’Ubuyobozi bw’Umujyi wa Kigali, barebeye hamwe ingingo zitandukanye zirimo: Uko ibibazo abaturage bagejeje ku badepite byakemuwe Gukumira no gukemura ibibazo by’abaturage Gahunda zo kunoza imitangire ya serivisi Irangizwa ry’imanza zaciwe n’inkiko zisanzwe, Inkiko Gacaca, n’imyanzuro y’Abunzi, n’ibindi. 

Ku masaha y'igicamunsi, Abadepite basuye ahatangirwa serivisi mu mirenge 35 igize Umujyi wa Kigali. Ibiganiro bagiranye n’ubuyobozi n’abatanga serivisi z’ikoranabuhanga byibanze ku nyungu abaturage bakura muri serivise bahabwa hifashishijwe ikoranabuhanga n’ingamba zo gukemura imbogamizi zaba zikigaragara.

Umujyi wa Kigali wagaragarije Abadepite ingamba wafashe mu kurushaho kugeza ku baturage serivise nziza, harimo: 

• Ubugenzuzi ku miyoborere n’imitangire ya serivise
• Amahugurwa y’abakozi ku mitangire ya serivise
• Gukoresha ikoranabuhanga ku buryo umuturage akurikirana aho serivice yasabye igeze ari iwe
• Ubugenzuzi ku myubakire hakoreshejwe satelite
• Umubare w’abakozi ugenda wiyongera
• Hongerewe “physical plans”
• Kwishyura serivise z’ibyangombwa hakoreshejwe ikoranabuhanga n'ibindi. 

Ku Cyumweru ari nawo munsi wa nyuma w'uruzinduko rwabo, Abadepite baganirije abaturage ingingo zinyuranye zirimo: 

• Ubumwe n’ubudaheranwa by’Abanyarwanda
• Imitangire ya serivisi zinyuranye
• Kwirinda amakimbirane
• Gukemura ibibazo mu bwumvikane
• Kwitabira umurimo
• Gusigasira ibyagezweho n'ibindi. 

Igikorwa cyo gusura Umujyi wa Kigali nicyo gisoje ingendo rusange z’Abadepite mu gihugu hose (Gicurasi-Kamena 2025), aho basuye imirenge 237,  mu turere 30, bareba imitangire ya serivisi mu nzego z’ibanze hibandwa cyane kuri serivise zifashisha ikoranabuhanga. Nyuma y’iki gikorwa, hazategurwa raporo n’imyanzuro bizashyikirizwa Guverinoma.